Joan den astean denboraldi amaierako balorazioen albisteekin itxi genuen ofizialki denboraldia. Orain aurrera begiratu eta 2025/2026rako lehen mugimenduak iragartzeko unea da. Lehenengoa garrantzi handikoa da: Haritz Otxotorena Uralde (Hernani, 1995) izango da Antiguoko gizonezkoen lehen taldeko entrenatzaile berria. Entrenatzaile gaztea klub urdinera itzuliko da, bertan 2020/21 denboraldian aritu baitzen, oraingoan Ohorezko Mailako taldearen ardura hartzeko. Esperientzia handia du Hernani Kirol Elkarteko kategoria desberdinetan, eta duela gutxi Amorebieta talde teknikoan egin du lan, Espainiako Lehen Federazioko multzoan. Haritz ilusioz, konpromisoz eta jokamolde ideia argiarekin dator.
Konfiantza osoko eta gaitasun handiko talde teknikoa izango du lagun. Pettan Uralde izango da bigarren entrenatzailea, Haritzentzat konfiantza handiko pertsona, energia, inplikazioa eta eguneroko lana eskainiko duena. Oier Berrak ordezkari lanak egingo ditu, taldearen egunerokotasunean funtsezkoa den figura. Oier Errandonea, aurreko denboraldiko staffetik jarraitzen den bakarra, prestatzaile fisikoa izango da, taldea baldintzapean doitzeaz arduratuko dena, bere energia, poza eta profesionaltasuna eskainiz. Iker Benítez fisioterapeuta izango da, funtsezkoa jokalarien prebentzioan, errekuperazioan eta zainketa fisikoan.
Talde tekniko berritu horrekin, gizonezkoen lehen taldeak etapa berri bati ekingo dio, gogo, lan eta anbizio handiz. Zorte on guztioi, laster ikusiko dugu elkar.
