Emakumezkoen lehen taldeak garaipenik gabeko hiru partiden bolada eteteko asmoarekin ekin zion partidari. Hasieratik ikusi zen, ordea, ez zela partida erraza izango. Aurkaria oso joko ideia argiarekin zelairatu zen eta horrek talde urdinak bere estiloa inposatzea eragotzi zuen. Lehen zatia parekotasun handiarekin eta abagune gutxirekin joan zen, atsedenaldian 0-0ekoa islatuz.
Bigarren zatia hasi ondoren, lokalentzako lehen kolpea iritsi zen. Area aurreko aldetik egindako jaurtiketa bat Ireneren eskuadratik sartu zen, Zarautz aurretik jarriz. Golak eragina izan zuen taldean, eta talde bisitariak hamabost minutu eskasetan abantaila handitu zuen bi gol gehiagorekin, 0-3koa markagailuan kokatuz.
Amore eman beharrean, Moralesen taldeak izaeraz erreakzionatu zuen. Bi minutu eskasetan, Leirek bi gol sartu zituen, itxaropena itzuli eta emaitza 2-3ra doitu zutenak. Hortik aurrera, taldea buru-belarri aritu zen berdinketaren bila, baina ahalegina gorabehera, ez zuen partida berdintzea lortu.
Kolpe gogorra da taldearentzat, eta egoera iraultzen saiatuko da datorren igandean Barakaldon, Pauldarrak taldearen aurka. Taldearen batasuna funtsezkoa izango da zulo hau atzean utzi eta garaipenaren bidera itzultzeko.
